Шолжа кхален администраце даькъалабийцар къоаной
Шолжа кхален администраце болхлоша, иштта тайп-тайпарча доал деча даькъ тӏарча урхалленаша шоашкара даькъалабийцар боккхий нах, Халкъашта юкъерча къоаной денца, яхаш, хоам бу «Сердало» газетага моттигерча ӏаьдало.
«Из ди - вай къоаной сийдара, лерхӏам бара, уж юкъарлоно хьаллацара дика таро я. Хӏара шера дӏахьош болча боламе хоадалийтар вай къоаношта шоаш лоархӏаш а, безаш а хилар; цу юкъе шоашкара дакъа дера доал деча даькъ тӏарча моттигаша. Дикача гӏулакха тӏехьа хилар цунна чуйоагӏача организацей викалаш, дешархой, студенташ. Дешархой бахар къоаной болча, царна баркал ала, мах баь варгвоацаш йола ганз цар вай вахара юкъеена хиларах», - йоах хоамо. Тхоца къамаьл даьчо яхачох, лоархӏаме да дика вахара хьалаш хьакхоллар, уж дукхагӏа бахаргболаш, юкъарча вахара юкъе уж хилийтар.
«Шун вахар диза да доккхийча гӏулакхех, халонех, иштта коталонех. Шо ӏадаташ лорадераш да; тхона шоай хьаькъал, культура хьаенна. Тхо ӏомалу шугара, шун дувцарашкара дукха масал эцаш хьалкхувш доагӏа. Шо дуненна седкъий да къонача тӏехьенна, тха декхар да шоана дикача къоанала, терконна, безаман ӏолашо яр», - аьлар болам дӏахьош хиннараша.
