Магасерча таьрахьашца дегӀаахара Академе, наӀараш йийлла Ди хургда
Магас-Шахьара таьрахьашца дегӀаахара Академе, дӀахьоргда йийллача наӏарий Ди. ГӏалгӀайчен бахархой таро хургья цу дешара моттигера хьалаш довза, лайчилла бетта 22-ча дийнахьа, яхаш, дийцар «Сердало» газетага цигарча зарбан болх лелабераша.
«Ӏуйрийна 11 сахьат даьлча денз 17 сахьат даллалца, таьрахьашца дегӀаахара Академе даькъ тӀа нах тӀаэцаргба. Программа чудоагӀаш да доазон тӀагӀолла экскурси яр, иштта «Ишкол 21» яхача моттиге дешарашца кхетаче дӀаяхьар, Акселератора тоаба а цу юкъе йолаш. Хьаьшашта гойтаргда дешара хьалаш, лаьрххӀа йола курсаш», - йоах хоамо.
Из болх вӀашагӀбеллараша яхачох, цу юкъегӀолла саькура бетта хоржарашта юкъе хила ловчо дехар чудала йиш я, мах боацаш онлайн-курс яккхара «Бизнес йолаяра хьалхара гӀа». Цо таро лургья къахьегама даькъ тӀа болх лаха, иштта дегӀадоаладе ший таьрахьий гӀулакхаш.
