Къамий юкъарча «Эльбрус» яхача лагере хиннача кхетаче, хьехам белар вайцигарча викала
25.07.2024 11:37
«Эльбрус-2024» яхача къамий юкъарча лагере кхетаче йолаш, цига дакъа лоацаш хилар федеральни, къамашта юкъерча программашта хьалха латта вай мехкахо Охценаькъан Ислам.
Из хоам «Сердалога» бир ерригача Кавказа кагирхой кхетачен доакъашхоша.
«Ислам, дукхача хана денз, хьинаре къахьегаш, ше лаьрхӀар кхоачашде гӀерташ, шийна ховр, Ӏомадаьр кхычарца декъаш хьавоагӀа. Укх наькъа, Балкхарой мехкарча къаман гӀулакхехи юкъарча проектехи йолча Министерствос дӀайихьача кхетаче, дешара программа йовзийташ, къамаьл дир вай мехкахочо», - йоах тхогарча хоамо.
Тайп-тайпарча къамий 100 дешархочоа юкъера барт, безам чӀоагӀбара тӀехьа кхелла цхьанкхетараш, тоабай балхаш, кхетама хьал тохкаш дола ловзараш, боккха пайда луш йола лекцеш яр вӀашагӀкхетаре.
