«Овла» яхача ансамбло концерт делар «Шереметевски цӏагӏа»
Санкт-Петербургерча мукъама музее «Шереметевски цӏагӏа» гӏалгӏай къаман мукъама оаз хазийтар «Овла» яхача ансамбло. «Гӏалгӏай къаман мукъама культураца дувзаденнараш дайзар цига гулбеннарашта.
Иштта цига хьабийллар вай къаман дувхарах, пхьараша хьаяьча цхьацца хӏамаех латта гойтам. Гӏалгӏайчен Паччахьалкхен суртанчий музейс, «Фяара» яхача арт-студе боаржабаь болх бар из.
Концерт вӏашагӏделлараш - мукъама музей «Шереметевски цӏа», республикера культуран гӏулакхех йола министерство, «Дзурдзуки» яха историко-географически оагӏув», - дийцар «Сердалога» цу оагӏонцарча министерствон болхлоша. Гӏалгӏай къаман йӏаьхий йола культура йовзийтара тӏехьа геттара товш моттиг яр Шереметевски цӏа.
Вай къаман мукъама оаз тамашийна, хоза хеташ бар ладувгӏаш баьгӏараш. Мехкашта юкъера бувзам чӏоагӏбеш, тхьоврача хана денз вай къаман наха лелаеш хьайоагӏа чӏондарг елар музейна совгӏата. Культуран хӏама доаржадара тӏехьа лоархӏаме я иштта йола кхетаченаш.
