ГӀалгӀайчера «ТӀаргим» яха ансамбль, «GRAND FӀNAL» яхача фестивале котъяьлар
«ТӀаргим» яха Илдарха-ГӀалан культуран ЦӀен берий халхара ансамбла къона доакъашхой котбаьлар, Георгиевске хозача оагӀорахьара ГӀалгӀайче гойташ. Халкъашта юкъерча шоллагӀча «GRAND FӀNAL» яхача хореографе, инструментальни, вокальни искусствон яхье; начӀал долча гӀалгӀай хореографа Беканаькъан Адама Ӏомабеш болча халхарчаша лакхара говзал дӀагойтар.
«ТӀаргим» яхача ансамбла гӀадбигар гулбеннараш, шоай тайп-тайпарча халхарашца. Кхелахошта хьалхашка гойтар «Лезгинка», «Магасе сатассар», «Кагирхой халхар». ХӀара халхар ше-ший говзалца белгалдоалаш дар, цига го йиш яр артистий начӀал, дегӀа маьженаш хьоаеш хилара говзал, халхара оамал», - аьлар «Сердало» газетага Илдарха-ГӀалан культуран цӀен кулгалхочо Овшанаькъан Къамбулата.
«ТӀаргам» яхача ансамбло дикача толамашца чакхъяьккхар из фестиваль. «Лезгинка», «Магасе сатассар» яхача халхарех царна делар лауреатий цхьоалагӀча лерхӀама дипломаш. Эггара лоархӀамегӀа дар Гран-при яккхар, цо белгалду ансамбла говзал лакха хилар.
Халхара тоабан хӀара доакъашхочунна цхьоалагӀча лерхӀама лауреата диплом делар. «ТӀаргим» яхача ансамбла доакъашхоша, халкъашта юкъерча майдан тӀа, лакхара говзал гойтара белгало я из.
