«Тхо духьала да гӀаьле озара!» яха болам дӀабихьар Ӏаьлий-Юрта
Ӏаьлий-Юрта дӀабихьар «Тхо духьала да гӀаьле озара!» яха хьехам луш бола болам, из вӀашагӀбеллабар моттигерча культуран ЦӏагӀа Ӏоамалуш долча бераша, №1 йолча юкъарча дешара ишкола дешархошца цхьана.
«Из дӀахьош хилара маӀан дар берашта, ондаргашта из лоархӀаме хоам бовзийтар: гӀаьле сага могашала доккха зе деш хилар. Доакъашхой хьежар из царна довзийта, гӀаьле озарах хьадоала во доккха долга хьалхадаккха: цо пехкаш, дог, хьоа хӀалакбеш хилар гойта; из озаш вола саг физически эшам болаш а хьаькъала тӀехьавусаш а хилар царна довзийта», - аьлар «Сердало» газетага Ӏаьлий-Юртарча культуран Цӏен кулгалхочо Гӏаьнажанаькъан Мадинас.
Къаьстта цу боламо теркам тӀабахийтар спорта, кхоллама, дика салаӀара, могашал тоаяра, иштта вахар сийрдагӀа хилийтара.
Кхетаченна чӀоагӀа раьза хилар дешархой, цу темах цар пайда а ийцар.
