Вай дегашта из ди дицлургдац! ЦIаккха а бицлургбац, шоай Даьхен йIовхалах хьегаш, мехкабаларга сатувсаш, цу иразга ца кхоачаш, цига вахар хаьдараш. Казахстане вай къаман дукха нах байнаб. Ха дIаяхаяле а, дег тIара човнаш ерзаргьяц, бехк боацаш халонаш Iовшаш, гаьнарча, хийрача мехка Iазап эзараш дег чура дIабалац.

Байлургбац из бала вай къаман нахá! Иззал хало текхача а дехадац вай денал дола къам! Сийрдача, кердача вахаре наькъаш дехкаш, дIаболхаш ба гIалгIай», — аьлар, тхоца къамаьл деш, культуран гIулакхах йолча министерствон кулгал деча Лаьнанаькъан Залинас.

Гулбеннараша кхетадир, вай кхувш латтача тIехьено из ди дицдергдоацилга. Цунна тешал деш дар, къам мехкахдаьккха ди гойташ, бераша дехка сурташ.