ГӏалгӀайчен СВО ветераний цхьанкхетарои халкъа фронтои шоайла бувзамаш леладергда
ГӏалгӀай Республикан лаьрххӀача тӀема операце доакъашхой ассоциаци, Халкъа фронт шоайла бувзам лелабеш хургья СВО бӀухоша дӀахо беш бола болх дукхагӀа пайда бахьаш хургболаш, яхаш, дийцар «Сердало» газетага ассоциаце викало.
«Балха тӀехьа вӀашагӀкхетар дӀахьош СВО ветераний ассоциаце кулгалхочо Саккхаланаькъан Мусас, Халкъа фронта гӀалгӀай даькъа кулгалхочо Тӏонганаькъан Башира, ГӏалгӀай Республикан СКФО гӀолла викал ваьча Россе Президента чувоагӀаш волча Фаьрганаькъан Мовсара белгалдир балха тӀа дикагӀа хургдола, кхоачашде деза дешаш. Цар терко тӀаяхийтар новкъостал лоаттадара йолча оагӀонна, (цу юкъе ветераний могашал меттаоттаяра). ЛоархӀамегӀа дола декхар дар бӀухошца цар гаргарча нахаца бувзам лелабар, моллагӀа дола хаттараш кхоачашдара», - аьлар тхоца къамаьл даьчо.
Цо яхачох, цар цхьа барт болаш лаьрхӀар цхьана проекташ вӀашагӀйохка, федеральни программа таронаш юкъейоахаргйолаш, ма хулла сихагӀа Даьхен доазув лорадеш латтача бӀухошта новкъостал дӀакхачийта.
