Керда UAZ Profi машинаш кхаьчар вай хьун боахам лораберашка
29.07.2024 12:01
Iалама гIулакхех йолча Министерстве, хьунагIара цIи йоаеш йола керда UAZ Profi машинаш кхаьчар. Из хоам «Сердало» газетага бир министерствон болхлоша.
Хьунашка ювлаш йола цIераш дIайоаяра тIехьа, чIоагIа эшаш я керда машинаш. ЦIи яьннача моттиге болхлой сиха дIакхоачабеш, лозабаьрашта хьалхара гIо де аьттув болаш, чIоагIа дика машинаш я вай хьун боахамга кхаьчараш. Дукха тайп-тайпара кхоачам шоашта чухьа болаш, лоархIаме декхараш кхоачашде низ болаш я машинаш.
«Хьунаш лораяр» яхача федеральни, «Экологи» яхача къаман проекташка гIолла, баьнна аьттув ба из. Белгалде деза, 2019-ча шера денз, вай мехкарча хьун боахаме 50 машин кхаьчалга. ХьунагIа хинна хатар ма хулла сихагIа юстардаккха эшаш машинаш я уж.
