«Март» яхача Ерригача Россе ТОП-20 яхьий проекташта юкъе я Магасера Барта гӏала
«Март» яхача яхьашка котбаьннараш белгалбир укх деношка Парламентски библиотеке. ТОП-20 проекташта юкъеяхай Магасера дунен тӏара эггара лакхагӏа йола этнографически музей «Барта гӏала». Из хоам «Сердалога» бир Магасерча спортахи, туризмахи, культурахи йолча моттигера.
Россе 54 моттигера, иштта СНГ мехкашкара моттигаш яр яхьашта юкъе дакъа лоацаш хиннараш. Котбаьннараш белгалбеча кхетаче дакъа лоацаш бар Федераце Совета сенатораш, Паччахьалкхен Дума депутаташ, РФ тайп-тайпарча моттигашкара кулгалхой, инвестораш. 85 метрага кхоачаш лакха йола «Барта гӏала» туристашта езаенна, уж тӏалатташ моттиг я.
Магасерча спортахи, туризмахи, культурахи йолча моттиго, котало яккхара хетадаь, кулгашца хьадаь чӏоагӏа хоза совгӏаташ делар. ЦКСиТ кулгалхочун гӏонча волча Янданаькъан Абте белгалдечох, вай къаман ӏадаташца, истореца дувзаденнараш доаржадара тӏехьа болх лоаттабергба цар массахана.
