Интернете дӀахьоча бувзамга гӀолла, 2000 лорий хьехам беннаб вай мехка
09.07.2024 10:54
Россе йоккхача дарбанчешца 2000 совгӀа болх дӀабихьаб вай республико, ер шу доладелча денз. Из хоам «Сердалога» бир мехка кабмино.
«УнахцӀенон хьал тоадарах йолча проектага гӀолла «ТелеунахцӀенон хьехамаш» яхача оагӀонца бувзам лоаттабу вай мехкарча 15 дарбанчено», - йоах хоамо.
Интернете гӀолла моллагӀа хӀама хатта, тахка йиш хиларо, дикка пайда беш, аттачахьа боаккх вай мехкарча лорий болх. Лорашца дагавала гаьнарча шахьаре дӀаваха ца везаш, иштта моллагӀча хаттара жоп дала йиш хилар хам баь варгвоацаш да унахцӀено лораеча. Республике ваггӀашехь, довза йиш я хӀанз, цу мугӀарера моллагӀа хӀама.
