1500 дезала сагӀа лургда вай мехка
Мархий бетта сагӀаш деш, дика гӀулакх доаржадеш ба вай мехка. 1500 совгӀа болча дезалашта дӀакхоачаргда, Даьла духьа деш дола доккха сагӀа. Из хоам «Сердало» газетага бир республикерча парламенто.
«Дулх, хьоар, шекар, гарзаш чуйола тӀормигаш юртий, шахьарий кулгалхошка, дийшача нахага дӀатергда. Цар эггара из эшаш болча дезалашта дӀадекъаргда сагӀа. Цу юкъегӀоргба тӀема декхараш кхоачашдеш латтарий, цига вахар хаьдарий дезалаш, ОМОНА, СОБРа, Росгварде дезалаш. Иштта сагӀах дизза дола тӀормигаш дӀакхоачаргда хала боахкарашка, унахой цӀагӀа барашка, дукха бераш дарашка, цхьаь бахарашка», - йоах тхогарча хоамо.
Укх езача хана, иштта дика гӀулакх доаржадар чӀоагӀа лоархӀаме да, дикача хӀаманцара сага уйлаш сомайоах Даьла духьа сагӀа луш хиларо, халача хьале боахкарашта новкъостал даро.
