Боксёр лата кийча ва Европан хьалхален яхьашка
НачӀал дола боксёр Фаьрганаькъан Хьамзат цкъа котваьнна Ӏийнавац мехкашта а халкъашта а юкъерча яхьашка, хӀанз из кийчлуш ва Европан хьалхален яхьашка дакъа лаца, яхаш, дийцар «Сердало» газетага ГӀалгӀай Республикан бокса федераце.
«Россе вӀашагӀтехача тоабан доакъашхо волаш, из лоархӀамеча яхьашка лата кийчлуш ва, уж дӀахьоргья тов бетта цхьоалагӀча дийнахьа денз цхьайттлагӀча денга кхаччалца, Босне, Герцеговине.
Хьалхаленга кийчо еш, Хьамзат хилар Кисловодске, 20 дийнахьа тренировкаш дӀахьош. Карарча хана цо гойт, Булгучанаькъан Мухьмад хьехамча а волаш, «Хьун йист» яхача Серпуховерча спортивни комплексе шийна фу карагӀдаргда», - аьлар хоамо.
ХьалхагӀа «Сердало» газета яздаьдар Фаьрганаькъан Хьамзат Россе Хьалхален боксах болча 13-14 шу даьннача латархошта юкъе котваьнна хиларах, из бахьан долаш халкъашта юкъерча латаре дакъа лоацаш ва из хӀанз.
