Профсоюзий яхьашка дошув даьккхар вай боксёра
Россе профсоюзий ЦС ФСО боксах йолча яхьашка дошо майдилг йоаккхаш, белгалваьлар вай мехкара боксёр Фаьрганаькъан Хьамзат. Из хоам «Сердалога» бир спорта оагӀон болхлоша.
«Укх бетта 10-ча денгара 17-ча денга кхаччалца Ставрополерча Суворовски оалача станице дӀахьош хилар 2010- 2011-ча шерашкарча спортсменашта юкъера боксах йола яхьаш. Россе ерригача миӀингашкара спортсменаш бар дакъа лоацаш. 60 кг дозал долча боксёрашта юкъе белгалваьлар Булгучанаькъан Мухьмада кхеваь спортсмен Фаьрганаькъан Хьамзат», - дийцар тхога цу оагӀонцарча министерстве.
Йоккха говзал гойташ, чакхваьлар вай спортсмен. Хьалхарча латаре из котваьлар Краснодарерча спортсменал, шоллагӀча оагӀонцарча латаре эшавир цо Ростовски областера спортсмен, тӀеххьарча латаре Селий мехкара спортсмен эшавир цо, 5:0 йолаш. Цу яхьашка говзал, низ гойтарах, Россе яхьашка дакъа лоацаш хургва вай мехкахо. Цу гӀулакхо хьагойт, вай мехкара боксах йола ишкол ший хӀама дикка доаржадеш, къахьегаш йолга.
