Вай боксёр Ерригроссийски яхьий финалага кхаьчар
15.11.2024 09:48
Фаьрганаькъан Хьамзат керда толамаш доахаш ва, ше хержача гӀулакха тӀа. Цо шийца латаш хинна кхо спортсмен эшавир, цу тайпара, Россе цӀихезача тренера Аксёнов Александра сийна дӀахьош йолча Ерригроссийски бокса яхьашка котваьлар из, яхаш, дийцар «Сердало» газетага ГӀалгӀай Республикан бокса Федераце.
«Вай спортсмен 14-15 шу даьннарашца латаш вар. Булгучанаькъан Мухьмад хьехамча а волаш, цо котало яьккхар Челябински областа, Селий Республикан, Москва-Шахьара спортсменашкара. Лайчилла бетта 16-ча дийнахьа Фаьрганаькъан Хьамзат яхьеваргва Рязански областа вахархочунца Мацуев Александраца», - аьлар хоамо.
