Борза майдилг яхьаш, цӀакхаьчар вай спортсмен
15.04.2024 10:13
Боксах йолча Тверской областе дӀайихьача яхьашкара, борза майдилг яьккха цӀавера вай спортсмен. Из хоам «Сердалога» бу боксах йолча федераце.
«Осташково яхача шахьаре дӀайихьар яхьаш. 72 Россе моттигашкара 524 спортсмен гулвеннавар цига шоай низ гойта.
Ший говзал дӀахьокхаш хилар цига вай мехкахо Овшанаькъан Ӏаддал. Овшанаькъан Тимура, Боканаькъан Хьусена, БӀарахой Мустафас кхеваь къона спортсмен дикагӀчарна юкъе нийсвелар», - йоах тхогарча хоамо.
Россе гулъяьча командан визза доакъашхо ва из хӀанзчул тӀехьагӀа. Россе йоккхача яхьашка дакъа лаца аьттув баьккхар цун бувцача толама.