ГIалгIайчен боксераш Суворовский станице дIахьош хиннача яхьашка дика латар
23.10.2023 10:10
Тайп-тайпарча боарама 15 майдилг ера ГIалгIайчен тоабо Предгорни кхален тIарча Суворовски станице дIахьош хиннача боксах йолча яхьашкара. Халкъашта юкъера йийлла турнир яр дIахьош хиннар, яхаш, дийцар «Сердало» газетага ГIалгIай Республикан бокса федераце зарбан болх лелабераша.
ДIадахача салоIача деношка хинна спортивни кхетаче хетаяьяр из вIашагIъеллараша, Предгорни кхале хьакхелла ди хилара. Цига дакъа лоацаш хилар 150 спортсмен, уж бар, Къилбаседа Кавказа федеральни, ГIибухерча федеральни доакъош тIара 10-11,12-13 шу даьнна спортсменаш. ГIалгIайчен спортсменашта юкъе дика дакъа лаьцар Ӏахилганаькъан Самира, Иленаькъан Ахьмада, Тирканаькъан ИсмаIала, Галай Хьамзата, Боканаькъан Башира, Баркинхой Османа, Мартазанаькъан Расула, Овшанаькъан Iаддал-Къаьдара. Дото моттигаш яьхар ТIоаршхой Ислама, Гаьгенаькъан Берса, Шоанахой Мухьмада, Цхьорой Iумара, Битенаькъан Мухьмада, Iоахарганаькъан Дамира, Буражанаькъан Рукъмана, Баркинхой Iумара»,- аьлар тхога баьча хоамо. Уж кийчбаьраш бар хьехамчаш: Баденаькъан Адам, Чахкенаькъан Ислам, Хамхой Къаьдар, Леймой Мухьмад, Дзовранаькъан Мухьмад, Баркинхой Ваха.
