ГӀалгӀайчен боксёраша «Меттаоттадар» яхача яхье толам баьккхар
ГӀалгӀай Республикан боксёраша пхиъ майдилг яьккхар «Меттаоттадар» яхача йийллача яхье, яхаш, дийцар «Сердало» газетага ГӀалгӀай Республикан бокса Федераце.
«Къарший къам шоай мехка юха цӀадена 68-гӀа шу хилара хетаяь дагалоаттама кхетаче дӀайихьар. Цига гулбелар моттигера санна, кхыча республикашкара а спортсменаш, иштта ГӀаьбартой-Балкхарой, Селий, Нохчий, ГӀалгӀай мехкашкара, ГӀирмера викалаш», - аьлар хоамо.
Цу яхьашка котбаьлар Хамхой Мухьмад (51 кг), ЦӀечой Абу-Муслим (66 кг).
ШоллагӀа моттиг яьккхар Хамхой ИбрахӀима (54 кг), Джанхотанаькъан Элберда (63 кг), Ноакастхой Ислама (57 кг).
Белгалду, цу яхьашка, шоаш Ӏомабеш барашца дакъалоацаш хилар ГӀалгӀай Республикан бокса керттера тренер Дарсиганаькъан Або, ондаргий гулъяьча тоабан воккхагӀа вола тренер Хамхой Ӏаддал-Къаьдар.
