ГӀалгӀайчен боксёраш котбаьлар «Россе» ФСО ЦС профсоюзий хьалхале къайсача
ГӀалгӀайчен боксёраш котбаьлар Ерригроссийски Профсоюзий Физкультурно-спортивни юкъарлон Центральни совета боксах йолча хьалхален яхьашка, уж дӀахьош яр, саькура бетта денз тушола бетта шоллагӀча денга кхаччалца, Суворовски станице, яхаш, дийцар «Сердало» газетага ГӀалгӀай Республикан спорта Министерствос.
Цигара хьабайтача хоамо яхачох, 160 гаргга волча 13-14 шу даьннарашта юкъе спортсменаша гойтар шоай латарах йола говзал. ТӀоарска кулгахйоаллорг яккхара дӀадихьар 3-4 латар.
«Дзовранаькъан Ислам (40 кг),ТӀоаршхой Ислам ( 44 кг) хилар дото совгӀаташ даьхарех, из бахьан долаш уж хургба Сыктывкаре (Коми Республике) дӀахьоргйолча Россе хьалхале йоаккхача дакъа лоацаш.
Юхевисача виъ спортсмена - Келаматанаькъан Хьусена (40 кг), Къоастой Хьамзата (48 кг), Баркинхой Мухьаммад-Ӏаьлас (50 кг), Янданаькъан Рамзана (66 кг) «борза» совгӀаташ даьхар», - аьлар тхоца къамаьл даьчо.
