Шолжа-ГӀалий тӀа дӀайихьача яхьашка, дакъа лаьцар вай боксёраша
26.03.2024 10:11
«Динамо» яхача моттиге, Нохчий мехка дӀайихьача ерригача Россе боксах йолча яхьашка, вай къам довзийташ хилар гӀалгӀай мехкара боксёраш. Хьалхабаьннарашта юкъе ва вай кхоъ спортсмен. Из хоам «Сердало» газетага бир боксах йолча федераце.
«17-18 шераш даьнна спортсменаш бар, Шолжа-ГӀалий тӀа укх бетта 18-ча денгара 24-ча денга кхаччалца йолча яхьашка гулбеннараш. 63,5 кг дозал дарашта юкъе борза майдилг яьккхар ГӀулой Акромата.
Хамхой Мухьаммада (48 кг), Колой Илеза (67 кг), Хьаьшанаькъан Аладина (92 кг) аьттув баьлар Россе дӀахьоргйолча яхьашка дакъа лаца баха.
Спортсменашта хьалхаваьнна вахар вар ондаргий гулъяьча тоабан тренер Хамхой Ӏаддал-Къаьдар», - йоах тхога кхаьчача хоамо.
