Магӏалбика кхален боксёраша лерхӏам бир закон лорадерий
Гӏалгӏайчен Магӏалбика кхален Соагӏапча физкультурно-унахцӏенон комплексе сийрда спортивни цӏай хилар - боксах йола кхален турнир, из хетаяь яр Россе чурча гӏулакхий болхлошта. Кхетаче спортивни говзал гойташ яр, иштта баркал оалаш хӏара денна закон, бокъо лораеш латтарашта.
«Латара даькъ тӏа ваьлар 120 гаргга спортсмен, уж бар Магӏалбика кхален, Магӏалбик-Шахьара викалаш. Царна юкъе бар къона боксёраш, хӏанз мара йоккхача спорте шоай никъ дӏаболабеш боаца, иштта лакха говзал йола боксераш, дукха коталонаш яьха бола. Яхьаш дика дӏайихьар. Хӏара саг лата аравалар хул ший тайпара терко тӏаозаш, боккъал йола спектакль санна, цо хьагойт спортсмений йохаргйоаца оамал, цар духьалъотташ хилар, дегӏацара низ», - аьлар «Сердало» газетага яхьаш вӏашагӏъехкараша.
Зале боккъонца дола цӏай дӏахьош санна хьал эттар, хӏара доакъашхочо ший тайпара спортивни оагӏон къайленаш гойтар, дукха бар уж хьаллоацаш тӏоараш детташ, дег чу дувшаш дола дӏайха дешаш царга кхайкадеш хиннараш.
Из кхетаче дӏаяхьара дика къахьийгар Магӏалбика культуран-салоӏама центра болхлоша. Хоза кийчъяь моттиг, еррига программа дӏаяхьа оагӏонаш чулоацаш, дика хьалаш долаш хилар накъадоалаш дар укхаза хьабаьхкача наха. Цох лаьрххӏа дола цӏай хилар.
