Шолже 200 совгӀа дезал хьаллаьцар, «Мехка сагӀа» луш
ГӀалгӀай мехка, Рамадан бетта тӀеххьарча деношка, «Мехка сагӀа» луш бола боккха болам дӀахьош ба, из вӀашагӀбеллар ва мехка кулгалхо Келаматанаькъан Махьмуд-Ӏаьла. Из лаьрххӀа, таро йоацача нахага новкъостал дӀа кхачийтара, деш да. Вай мехка из каст-каста доаккхаш дола сагӀа да.
«Кхачан кхоачамца новкъостал дир Шолже бахача 200 совгӀа дезала. Шахьара админстраце царна дӀаделар дулх, хьоар, шекар, даьтта, бе-бе Ӏовнаш чуйола тӀормигаш. Цу новкъостала юкъебоагӀаш бар Россе Донбасс лораеш дӀахьош йолча операцен доакъашхой дезал, иштта таро йоацараш», - аьлар «Сердало» газетага ГӀалгӀайчен Правительстве.
Рамадан бутт дикача гӀулакхий, къиноех нах цӀенбалара бутт ба. Цу хана дукхача наха сагӀа лу, дика гӀулакхаш ду, дикагӀа хила хьож.
ГӀалгӀайчен бахархой цу юкъе ба. Цар а иштта дика сагӀа лу, тайп-тайпара кхетаченаш ю, таро йоацарашка хьож, эшачунца новкъостал а деш.
Рамадан бетта гонахьарча наьха хьашташ кхоачашдар лоархӀаме да, дукхача наха дика хет цу тайпара сагӀаш деш.
