Мерзача хӀаманна тӀера бола вай мехкара бахархой 35% кхоачаш ба
01.04.2024 10:55
Торташ, шоколадаш, пирожнеш яара тӀера ба шоаш, аьлар вай мехкарча 35% бахархоша. 100 сагаца къамаьл деш, оаха дӀабихьача хоаттама балхо гучадаьккхар из.
«Гонахьа багӀаш новкъостий болаш, хьалхашка латташ чайи модз санна мерза торти хилча, из ца юаш Ӏе хала да», - аьлар цхьан вахархочо. 60% бахархошта мерза даараш хоза хет, бакъда, дегӀа могашала зе деш хуле, уж йита хала хетац царна.
75% мехкахошта чӀоагӀа хоза хет модзи гӀалгӀай хьовлеи. ХӀаьта 80% бахархой, сайран марха доастача хана, шоай цӀагӀарбарашта тайп-тайпара мерза даараш дахьа гӀерташ хул.
