«ЛоархӀаш болча, спортивни даькъ тӀа дукхача шерашка къахьегаш хьабоагӀача хьаьшашта юкъе бар ГӀалгӀай Республикан хьалхара вице-премьер Йовлой Мухьмад, ший лоӀамеча латарах цӀи хеза кхозза олимпийски чемпион Фазаев Арсен.

Цар ловцаш даьхар, яхьашка дакъа лоацаш хиннарашта котало яккхарах», - йоах хоамо.

РФ дукхача моттигашкара венача 500 совгӀа волча къонача латархочо шоашта могар дир цу даькъ тӀа лакха говзал гойташ, хьалхара моттиг яккха гӀерташ.

ГӀалгӀайчера мехкарча спортсменаша дукха майдилгаш яьхар, дика толамаш а гойтар. Цу яхье котбаьннараш ба Ӏаьленаькъан Мухьмад-Башир, Чиленаькъан Мухьмад, Йовлой Ӏаддал-Рахьим, Ужахьанаькъан Дрес, Дарсиганаькъан Микаил.

Дото майдилгаш яьхар Ӏамарханаькъан Мухьмад-Амина, Боканаькъан Адама, Тиймарзанаькъан Рахьима, Къоастой Ӏаддал-Малика.

Боарза совгӀаташ даьхарех ба ЦӀечой Хьадис, Зангенаькъан Мухьмад, Ужахьанаькъан Ахьмад, Тиймарзанаькъан Ӏийса, Алмазанаькъан ӀабдуллахӀ, Пхьилекъонгий Хьамзат, Ӏоахарганаькъан ӀабдуллахӀ, Мисловранаькъан Ахьмад, Белокинаькъан ӀабдуллахӀ.

Мехка министрий кабинете, спорта министерстве къона латархой даькъалабийцар, цар вахаре спортивни даькъ тӀа аьттув хилар ловш долча дешашца.