Вайцига хьаллаьцар 500 совгӀа ахархо
![Вайцига хьаллаьцар 500 совгӀа ахархо](http://serdalo.ru/storage/FkYF6vCxTzEDWVO2zUnsw7pX2C5KEEaXtoFkiP5I.jpg)
ГӏалгӀайче 2024 шера хьалхарча ах шера 524 юртбоахамхочоа новкъостал дир, яхаш, дийцар «Сердало» газетага мехка кулгалхочун зарбан болх лелабераша.
«Карарча шера, юртбоахам дегӀабоалабара, республикан бюджетера 460,5 млн сом хьожадир. Хьалхарча ах шера 350,4 млн сом дӀадахийтар, из да хьахьожадаь хиннача ахчан тӀара 76%», - аьлар ГӏалгӀай Республикан кулгалхочо Келаматанаькъан Махьмуд-Ӏаьлас.
Дуккханахьа дӀадахийта дезаш хилар из ахча: шоай доалахьара юртбоахам лелабеш болча дезала цкъара луш долча пособегара юртбоахама культурай дикал лакхъярга кхаччалца.
Цо къахьегамхошта хьалхарча аргӀагӀа латташ дола декхараш кхоачашде дика новкъостал ду. Юртбоахама технически хьал тоадара, эшаш дола гӀирсаш эцара, дика хьувкъам кхебара новкъостал хул цох.
Белгалду, мехка Ӏаьдало эггара хьалха терко лоаттаю коопераци дегӀайоалаяра. Из хилар бахьан долаш, боккха боацача боахамо цунга хьежжа ше арахецача кхачан дикал лакхъю, маьхаш лохагӀа хулийт.