Наьсарерча урамашка лостам бе арабаьлар болхлой
Шахьарерча моттигашка лостам беш, къахьийгар Наьсаре. Из хоам «Сердалога» бир шахьара мэре.
«Дукха хӀама кхоачашде аьттув баьлар ЖКХ болхлой цу кӀира», - йоах тхогарча хоамо.
Урамашка хьаӀайна латта нувхаш, Ӏолийга гӀаьнаш дӀадоахаш, гӀашлой наькъаш, нах сувцаш йола остановкаш юлаш, массайола моттигаш цӀенъеш, къахьийгар цу беркатеча наха.
Иштта шахьарерча хишта, догӀашта лаьрхӀа гӀувнаш цӀенйир, цар боккха болх дӀахьош. Гуйран догӀаш доладала йисар дукха ха яц, цудухьа чӀоагӀа лоархӀаме ба из болх. Иштта буц дӀахьокхаш, гаьнаш, кӀотаргаш дӀатедаш, зизашта гонахьара моттигаш тоаеш, баьхкар шахьаре.
Шахьара хьакимаша баркал кхайкадир ЖКХ болхлошта, шоай декхараш бехктокхаме кхоачашдеш хиларах. ХӀаьта шахьара бахархошта хьалхадаьккхар; нагахьа нувхаш хьаӀайна, лостам бе безаш йола моттиг оашош зийча, шахьара даьга е ЖКХ диспетчерске дӀаязде йиш йолга.
