Нохчашкахьа дӀайихьача мехкашта юкъерча яхьашка, котбаьлар вай латархой
![Нохчашкахьа дӀайихьача мехкашта юкъерча яхьашка, котбаьлар вай латархой](http://serdalo.ru/storage/un9NzeBY4rmxmLQsyo9MNe5bamyskYFYw8PkXZ9R.jpg)
Эллиной-румий оалача латарах йолча мехкашта юкъерча яхьашка котало яьккхар вай спортсменаша. Чечен–Ауле дӀайихьа яхьаш хетаяь яр Нохчий Республикан хьалхара президент КадыровгӀар Ахьмад-хьажа ваьча денна. Из хоам «Сердалога» бир спорта гӀулакхех йолча моттигерча федераце.
«Ше-ше котвала гӀерташ, бӀарччача кхаь дийнахьа «Ахмат» яхача Чечен-Аулерча спорта моттиге шоай низ, говзал дӀахьокхаш хилар 8 шергара 16 шерга кхаччалца бола спортсменаш. Котбаьннараш - Йовлой Саид (38 кг), Налганаькъан Ислам (60 кг), Оздой Салават (42 кг). ШоллагӀча лагӀа тӀа эттараш - Хамхой Азраил (80 кг), Оздой Ӏумар (55 кг), Сейнарой Мухьмад, Саид (35 кг)», - йоах тхога бенача хоамо.
«Ади-Ахмад» яхача спорта клубо кхебаьча Махлой ИсмаӀала (41 кг), Хамченаькъан Сайфудина (38 кг), Хамченаькъан Мансура (45 кг) борза майдилгаш яьхар.