Хургболча лораша къамаьл дир, СВО ветеранаца Шоанахой Муслимаца
13.10.2025 15:45
Къилбаседа Кавказа лорий колледжа студентий къамаьл хилар, лаьрххӏача тӏема операце ветеранаца Шоанахой Муслимаца, яхаш, хоам бу «Сердало» газетага из болх вӏашагӏбеллараша.
«Кхетаче дӏайихьар Наьсаре, шоайла къамаьл дара кепе, цига таро хилар цхьадола хаттараш дала, къайле йоацаш деча къамаьлаца кхетаче безаме дӏаяхьа. Студенташта дукхагӏа дезаш хиннар дар тӏема мугӏарашкара хьал дикагӏа довзар, бӏухошта нийслуш йола халонаш малагӏаш я хар. Муслима къаьстта дийцар ший тӏема новкъостех, белагалдир из санна долча хьалашка мел лоархӏаме да шоайла новкъостал деш, кхеташ хилар», - аьлар хоамо.
Цул совгӏа, студенташа хеттар лорашца дувзаденнача гӏулакхех. Тӏема доакъашхочо дийцар бокъонца вола ший балха говзанча хилара фу ха а фу де а деза.
