Культурах, спортах, туризмах йолча Магасерча моттиго берашта экскурси йир
Эккажкъонгий-Юртарча № 1 йолча ишкола дешархошца экскурси дӀайихьар Магасерча культурах, спортах, туризмах йолча моттиго. Из гӀулакх хетадаь дар дерригача дунен тӀа бӀаьстан хьалхарча бетта 20-ча дийнахьа дездеча хьалкъашта юкъерча ираза Ден. «Сердалога» из хоам бир ЦКСиТ кулгалхочун декхараш кхоачашдеш волча Янданаькъан Абте.
«Боккхача дезалера бераш, СВО доакъашхой дезал, тӀехдика дешараш цу дийнахьа Заьзганаькъан Идриса цӀерах йолча проспекте гӀолла гӀа боаккхаш хилар.
Экскурсовод йолча Янданаькъан Ханнас берашта дийцар шахьарерча администрацена хьалхашка бюст латтача Крупнов Евгенех. Токацарча машинаца (гольфкараца) гӀалгӀай республикан эггара хьалхарча кулгалхочун Заьзганаькъан Идриса оттадаь сийленг долча кхаьчар уж.
Къаман вахаре лоархӀаме дакъа лаьцача цу сага вахара никъ байзар царна», - дийцар тха газетага. Экскурсе тӀеххьара моттиг Барта гӀала яр. Къаман Ӏадатех, оамалех, культурах дийцар берашта цу моттигерча музее.
