Илдарха-ГӀалий тӀарча АТК доакъашхоша кхетаче йир спортсменашца
Терроризм яхача зулама духьала къовсам лоаттабе цхьанкхетача Денца ювзаяь кхетаче дӀайихьар спортсменашца Илдарха-ГӀалий тӀарча терроризма духьале лоаттаеча комиссе доакъашхоша, ОМВД болхлоша, депутаташа, Россе МВД юкъарлен оагӀонцарча балха секретара. «Сердалога» из хоам бир шахьарерча администраце зарбан болх лелабеча МутаӀаланаькъан Мадинас.
«ФОКе дӀайихьача кхетаче кагирхошта дийцар, терроризм яхача бӀехача гӀулакхо дунен тӀа доаржадаьча зуламах, цох хьокхавенна саг ший ираз доадаьрех волга.
Интернета оагӀонашка лораде дезараш, цу зулама адам тӀахьехарашка ладувгӀа йиш йоацилга, нагахьа цу тайпара хӀама хоаделча Ӏаьдалга хоам бе безилга, хьалхадаьккхар къонача тӀехьенна. Фуй ца ховш йолча сайташта дӀатӀа ца вийлача дикагӀа долга белгалдир кхетаче», - йоах тхога бенача хоамо.
