Республикерча музее баха хилар Россе Юкъарча палатан доакъашхой
22.08.2024 11:21
Наьсарерча Малсаганаькъан Тухана цӀерах йолча музее баха хилар, вай мехка цхьацца болх дӀабахьа баьхка РФ Юкъарча палатан доакъашхой. ГӀалгӀай къаман культура, истори гойташ дола тамашийна хета хӀамаш дайзар хьаьшашта.
«Къаман доккха истори, культура йовзийташ хьаьшашца музее гӀолла чакхъяьлар экскурсовод йола Пхьилекъонгий Дали, Наьсарерча политехнически колледжа болхло Пхьарчанаькъан Аьсет», - дийцар «Сердало» газетага музея кулгал деча Саганаькъан Мухьмада.
Музеера хӀамаша йовзийташ, къаман истори хьахьокхаш шоаш тӀаэцарах, доккха баркал аьлар хьаьшаша. Белгалде деза, иштта долча гӀулакхо боккхача мехкарча миӀингашта юкъера барт, бувзам, лерхӀам чӀоагӀбелга.
