Cosmos Hotel Group безам болаш я, ГӀалгӀайче отель хьалъе
![](http://serdalo.ru/storage/aY2nSGrlbSiBWfCHRjy94xcd0vUdVen8OcVPLm2j.jpg)
Петербурге халкъашта юкъера экономически кхетаче йолаш, Россе йоккхагӀа йола гостиницаш хьалъю Cosmos Hotel Group безам тӀабаха яр, ГӀалгӀайче отель хьалъяра. Цох дийцар ГӀалгӀай Республикан кулгалхочо Келаматанаькъан Махьмуд-Ӏаьлас ший телеграм-даькъ тӀа.
«Вай мехка хӀара шера хулаш бола туристаш тӀакхеташ хиларга диллача, цу компанеца бувзам лелабар вайна эшаш да», - аьлар республикан кулгалхочо, мехка туризма таронаш ювцаш.
Махьмуд-Ӏаьлас белгалдир, таханарча заман йоккха, сийрда, хоза хьалъяь гостиницаш хиларо республике туристаш а дукхагӀа хулийтаргба, аьнна. Укхаза хӀара хьаьшанна кораергья ший тайпара культура йола исторе оагӀонаш, Ӏалама хозаленаш моттигаш, царна хоалургда хьаьша-да тӀаэцара хоза гӀулакхаш, дег чура йоагӀа наьха йӀовхал.
Туристически оагӀув дегӀайоалаяра, Ӏаьдало а дукха терко лоаттаю. Хьалхарчарех дола декхар да Ӏарамхи яха курорт тоаяр, из кердаяккхар, ГӀалгӀай Республикан лоаман даькъ тӀа а иштта шаьрача а салаӀара эшаш дола хьалаш вӀашагӀдохкар.
Цу юкъедоагӀаш да гостиницаш хьалъяр, салаӀа дика хьалаш дола моттигаш хилийтар, туристически наькъаш хьаделлар.