Берса-Юртарча урама цӀи хувцаргья яха хабар харцдир мехкарча ЦУРо
Укх тӀехьарча деношка интернета оагӀонашка геттара даьржа дола къамаьл бух боацаш долгах хоам бир республикерча ЦУРо. Бувзама оагӀонашка гӀолла даьржача хабарах, Берса-Юрта доккха къемат этта хинна ха хьатӀакхоачаш, цигарча Коминтерна урама цӀи хувца лерхӀ, ГӀалгӀайчен хьалхарча Президента Овшанаькъан Руслана цӀи тилла.
«Берса-Юртарча хьакимаша из бакъдоацилга белгалдир. ЛаьрххӀача хоамо йоах, Коминтерна цӀерагӀча урама цӀи хувца лаьрхӀа вӀалла хӀама хиннадац», - дийцар «Сердалога» мехкарча ЦУРе.
Бух боаца хоам баржара тӀагӀолла, ЦУРа болхлоша бахархошка дехар ду, интернета оагӀонашка гӀолла шоашта бакъ дий ца ховш дола хоамаш ма доаржаде, белггала гуш доацача хӀаман гонахьарча хабарех ма теша, яхаш. МоллагӀа хӀама нахалдаккха оттале, из бокъонца долаш дий тахка деза, цу оагӀонцарча моттигашка гӀолла.
