«Росси – Бусалба дуне: KazanForum» яхача кхетачене дакъа лоацаш ба вай мехкара викалаш
Казане дӀахьош йолча «Росси – Бусалба наьха дуне: KazanForum» яхача йоккхача кхетаче дакъа лоацаш ба вай республикера викалаш. Из хоам «Сердалога» бир Мехкадаь зарбан болх лелабераша.
«Экономикан, культуран оагӀонашца дувзаденнараш дийцар кхетаче, иштта бусалба динцара бувзам чӀоагӀбара, тоабара тӀехьа къамаьл дир. «RUSSӀA HALAL EXPO - 2024» яхача гойтаме дакъа лоацаш, Татарстана кулгалхочунца тайп-тайпарча кхетаченашка хулаш ха дӀайихьар цу кхетаче вайцигара бахача викалаша Мизенаькъан Руслана, массазара викал волча Илезанаькъан Микаила», - белгалдир вай Мехкадас Келаматанаькъан Махьмуд-Ӏаьлас, цу вӀашагӀкхетара лерхӀамах дувцаш.
Йоккхача кхетаче дийцар экономика хьал тоадарах, хьаьнала, беркатедар ма хулла доаржадарах, туризмах, иштта кхыдарех. Вай Мехкадас теркалдечох, иштта йолча кхетачено боккха пайда бу экономикан, культуран оагӀонашта. «Хьаьнала дола хӀама, туризм йоаржаяро бусалба мехкашкара бизнесменаш, хьаьший тӀаозаргба вай мехка. Из геттара лоархӀаме, терко е езаш хӀама да!» - белгалдир вай Мехкадас.
Цо хьоахадир; иштта йолча йоккхача кхетаченашка дакъа лоацаш, бувзам лелабеш хиларо гӀалгӀай мехка керда, беркате, вахара хьал, экономика тоаеш дола наькъаш хьаделларгда, аьнна.
