Таьрахьий кхерамзлен ди дӏахьоргда Гӏалгӏайчен къаман библиотеке
Янданаькъан Жамалда цӏерагӏча Гӏалгӏайчен библиотеке кхоана дӏахьоргда таьрахьий кхерамзлен ди. Из кхетаче чуйоагӏаш я «Кагирхой таьрахьий технологей кӏира» яхача Ерригроссийски ӏӏӏ-ча библиотекай болама.
Цига къамаьл дергда Гӏалгӏай Республикан НБ хоамий, автоматизаце отдела заведующе Хьоашаланаькъан Рамзана, хӏаьта доакъашхой хургба Шолжерча доал дара, кердача технологей колледжа студенташ, иштта цига дакъа лаца безам бараш.
«Цу кхетаченна чудоагӏаш, къоастадергда таьрахьий даькъ тӏара керттера кхерам бараш малагӏаш да. Ладувгӏаш барашта довзаргда дукхагӏа даьржа тийшаболх лелабара юкъедоаха хьалаш, лаьрххӏа бола хоам бовзара леладер, зене йолча программах, бакъйоацача онлайн-тикаех, инвестице проектех, «банка болхлоша» а иштта «бокъонаш лораераша» а еттача телефонах.
Хьоашаланаькъан Рамзана дувцаргда таьрахьа махбола каьхаташ лорадарах, законах доагӏача беса таьрахьий кхерамзлен ӏалашо ярах», - аьлар «Сердало» газетага Гӏалгӏайчен керттерча библиотеке.
Таьрахьашка валара ха хьаэтта хиларга диллача, бувзамашка гӏолла кхерамзлен ӏалашо ца лелайича яргьяц. Зулам дара цу тайпара хьалаш леладелга а, цох мишта лоравала веза а ховш хилча, хӏара сага таро хургья из кхерам юхатоха, иштта майрра леладе онлайн-гӏулакхаш.
