ГӀалгӀайченгара Паччахьалкхен Дума депутата МЧС болхлой цӀайца даькъалабийцар
27.12.2024 09:45
Шоай профессиональни цӀай дезду чоалханерча гӀулакхий боахама болхлоша. РФ Паччахьалкхен Думе ГӀалгӀайчера депутат волча Татренаькъан Муслима хьалхарчарца даькъалабийцар нах хатарех кӀалхарбоахараш.
«Россе МЧС болх беча 34 шера, дукхаза хьагойтад, дунен тӀа моллагӀча моттиге эттача чоалханеча хьала шоаш кийча хилар.
Хьамсара Россе МЧС болхлой, ветеранаш! Укх цӀайца аз даькъаладувц шо, шун чоалханеча профессеца, шо иштта шоай болх безаш, тешшаме цу даькъ тӀара из дӀахьош хиларах. Могаш, маьрша дахалда шо, чоалханера хьалаш кӀезигагӀа хилда шун балха даькъ тӀа, дукхагӀа дикахетараш хилда шун дезалашта!» - язду ший телеграм-канале Татренаькъан Муслима.
