Магас-Шахьара доакъоша болх мишта бу хьежар депутаташ
Ӏан денош тӀехьашка диса, карарча хана шахьарерча наькъий хьал малагӀча боараме латт хьажа арабаьлар Магасерча Кхела депутаташ. ДӀадахача шера «Кхераме доаца дика наькъаш» яхача программага гӀолла меттадоаладаьча Чахкенаькъан, Базорканаькъан цӀерах долча урамашкарча наькъий хьал мишта латт хьежар депутаташ. Асфальт, гӀашлой наькъаш, наха дехьабувла къоастадаь доазош миштад хьожаш чакхбаьлар уж. Из хоам «Сердалога» бир цу моттигера.
«Къаьстта уж ши урам дукха машинаш, адам лелаш ба. Чакхбаьккха болх боаггӀача боараме дӀабихьалга теркалдир депутаташа, гуйран-Ӏан хана лаьттача хаоттамах телхадац наькъаш», - йоах хоамо.
Бакъда цхьайолча моттигашка кхоачамбоацараш зийра цар. Тока бӀоагӀашта басар хьокхаш, вӀаштӀарадаьча цӀеной коашкара нувхаш дӀайоахаш, кхаьч-кхаьчача дер дайнараша даь ийрча йоазош дӀадоадеш болх дӀабахьа беза Магасе. Шахьара администраце тӀахьожам лоаттабергба цу гӀулакха.
