Итт ди хетадаь хургда гӀалгӀай метта
Таханарча денга денз саькура бетта 27-ча денга кхаччалца, дӀахьоргда гӀалгӀай метта, литература хетадаь итт ди. Из дӀахьош да Халкъашта юкъерча наьна метта хетадаьча Денна чудоагӀаш, из хӀара шера саькура бетта 21-ча дийнахьа дезду, яхаш, дийцар «Сердало» газетага ГӀалгӀай Республикан дешара, Ӏилман Министерствос.
Массаза санна дешара моттигашка тайп-тайпара кхетаченаш дӀахьоргья гӀалгӀай метта, литературанна хетаяь. Цу юкъе лекцеш, говзанч-хьехамаш, герга истолаш хургда; литератораша, лингвисташа дакъа а лоацаш.
«ГӀалгӀай мотт- хӀара къаман лоархӀаме тӀехьале я, цо хьакхолл культуран, вахара Ӏадаташ. Цудухьа, гӀалгӀай метта итт ди дӀахьош хилар лоархӀаме да республикан мотт дегӀабоалабара, цун культура хьаллацара.
ГӀалгӀай метта итт Ди белгал а деш, хӀара шера дӀахьош хиларо таро лу ГӀалгӀайчен кагирхошта из дикагӀа бовзийта, безабалийта», - аьлар дешара, Ӏилман Министерствос.
