Хьалхарчар вай республике Коталон байракх йоаржайир
ТӀема-спорта ловзарий, Къилбаседа Кавказа машинашца гобаккхара доакъашхоша, тайп-тайпарча моттигашкарча наха Коталон байракх йоаржайир вай республике. Из хоам «Сердало» газетага бир Мехкадаь зарбан болх лелабераша.
«Германи йохаеш, Советски Союзо котало яккхар белгалдеш я Коталон байракх. Эггара керттера дола цӀай хьатӀадоагӀаш; из боккха, лоархӀаме болам дӀабихьар вай мехка», - белгалдир вай мехкадас Келаматанаькъан Махьмуд-Ӏаьлас, Россе беррига бахархой вӀашкаозаш долча гӀулакхах дувцаш.
Иштта Мехкадас теркалдир, цу тайпарча боламашка дакъа лоацаш хилар, тайп-тайпарча ханашка Даьхе лораеш лаьттарий лерхӀам белга долга. «Дика хет, вай кагирхой иштта дола боламаш хьаллоацаш хилар, мохк лорабеш лаьттача наьха сий деш, уж биц ца беш хилар», - аьлар Мехкадас.
Фашизм йохаеш лаьттарашта хетаяь кхетаченаш дӀакхухьаш, боккхача тӀема истори тохкаш, къахьегаш ба вай къаман кагирхой тахан.