Сейнарой Бексолта бераша, къаман библиотеканна совгӀата, шоай даь сурт делар
ГӀалгӀайчен Янданаькъан Жамалда цӀерагӀча Къаман библиотеканна, шоай дезалгара совгӀата, цӀихезача гӀалгӀай паччахьалкхен, хӀарман болхлочун Сейнарой Бексолта сурт делар. Библиотекан болхлой из леладе лаьрхӀа ба шоай балха. Политикан дезал Руслан, Лейла керттерча библиотеке бахар, шоай да ваь ди долаш.
Сейнарой Бексолта ваьв 1938 шера, маьтсела бетта 20-ча дийнахьа. Нохчашта, гӀалгӀашта юкъе; хьалхара юридически Ӏилмай доктор вар из, цунна еннаяр Россерча цӀихезача юриста цӀи.
1980-1990 шерашка, «ГӀалгӀайчен Халкъа совет» яхача юкъара-политически хьанкхетара керте латташ, Сейнарой Бексолтас гӀалгӀай паччахьалкхе, ГӀалгӀай Республика хьакхоллача балха доккха дакъа юкъедера. Цо иштта дика дакъа лаьцар мехкахдаьхача къамий бокъонаш меттаоттаеш», - аьлар «Сердало» газетага ГӀалгӀайчен къаман библиотеке.
Библиотеке лорадеш да Сейнарой Бексолта Ӏилман балхаш, уж гойтама балхашта юкъе ца хилча даргдоацарех лоархӀаш а да, ГӀалгӀайчен тайп-тайпарча исторически ханашта хетадаь уж хилар бахьан долаш. Иштта лаьрххӀа дола гойтамаш да цига го йиш йолаш, цар дувц политикан, юкъарлон болхлочун вахарах, балхах.
Ши шу хьалха вайна юкъера дӀавахача Мухьмада Бексолта Ӏилман балхаш, мах баь варгвоаца тӀехьале хинна дӀаэттад, ГӀалгӀайчен культура, истори Ӏомадара наькъ тӀа. Уж накъадоал гӀалгӀай халкъ цаӀ хилар лорадеча, юкъарло дегӀайоалаеча.
