Исбахьален галерея хьаьший хилар ОВЗ дола бераш
Халкъашта юкъера заӏапахой ди долаш, Гӏалгӏайчен паччахьалкхен исбахьален галерея ший наӏараш хьайийллар, белггаларча хьаьшашта- лаьрххӏача коррекционни ишкола-интерната-Шолжа-шахьара берий беша.
Цо дика таро елар берашта хозагӏа мел дола культуран оагӏонца дувзаденна хьашташ, искусство йовзийтара.
Зӏамигача бахархошта кийчъяь хоза программа яр. Могашал эшаенна бераш хилар цхьацца долча галерея даькъ тӏа, царех хӏаране ший хозала никъ хьабеллар берашта хьалхашка, цига гӏолла йовзийташ вай мехкара ӏалама хозал, исбахьален, исторически хьамсарча мехка культуран мах бараш.
«Берашта гойтар Гуржий ССРа халкъа йоазонхой, иштта СССРа суртанчий Союза доакъашхочун Дугладзе Вахтанга лаьрххӏа бола гойтам, цун кхоллама мах бараш, кӏоарга сюжеташ. Боккха безам тӏабодаш бар «Гӏалгӏайче - басарашца» яха гойтам, цига гуш дар ӏаламца, ӏадаташца, хьамсарча мехкаца дувзаденна даь хоза балхаш. Къаьстта йола моттиг дӏалаьцар «Аькхенаькъан Хасолта Вахар, кхоллам» яхача гойтамо. Берашта довзийтар суртанчан вахар, цун кхоллам, цо Даьхенцара безам гойташ даьхка сурташ.
Эггара чӏоагӏагӏа берашта безабелар «Къаьнара Гӏалгӏайче» яха гойтам. Къаман дувхар, герз, вахаре лелабеш хинна гӏирс геттара терко тӏайодаш, ӏомабеш дар бераш. Дукхача бераша хаттараш дора, шоашта хетар оалар. Царна цох бӏаьха вахара никъ хилар», - аьлар «Сердало» газетага Гӏалгӏайчен Паччахьалкхен галерея зарбан болх лелабераша.
Экскурси дӏахьош бараш хьежар дукхагӏа искусствай оагӏонаш берашта гойта. Шолжерча ишкола-интерната дешархой хьалхара бар Исбахьаллен галерее, цар гӏадбахар, тамаш еш хилар юхь тӏа гуш дар.
