Берий беша ухачарна, дувц безача Рамаданах лаьца
МагӀалбика-Шахьара деша даха ха йоацача берий моттигашка кхетаченаш дӀахьу, безача мархий беттах Рамаданах лаьца дувцаш. Берашта довзийт Рамаданаца дувзаденна Ӏадаташ, цу лоархӀамеча мархий бетто ислама культуран юкъе малагӀа моттиг дӀалоац, шоаш зӀамига дале а, берашта хов Рамадан беттах лаьца.
«Деша даха ха йоацача берий моттигашка, даьша, ноаноша, хьехархоша берашта Рамадан беттаца дувзаденна Ӏадат дикагӀа царна довзийт. Иштта царна хьалхадоаккх цу бетта дика гӀулакхаш де дезилга, гонахьарчарца къахетаме хила везилга», - аьлар «Сердало» газетага МагӀалбика шахьара администраце.
Цу моча кхетаченаша довзийт берашта ислам, зӀамига долча хана денз, из лоархӀаме да берашта кхетам балара даькъ тӀа. Цул совгӀа, цо чӀоагӀду дезала юкъера ислама Ӏадаташ, цунца цхьана къаман культура, из ноахалгара ноахалга кхоачаш дӀадода.
