Берий бешамашка цӀи ялара кхерамзлен бокъонаш Ӏомаю
ГӀалгӀайчен МЧСа, Росгварде урхалленца цхьана, берий бешамашка цӀи ялара кхерамзлен бокъонаш Ӏомаю, яхаш, дийцар «Сердало» газетага из болх вӀашагӀбеллараша.
«Укх деношка, цӀи ялара кхерамзлен бокъонаш йовзийташ болх дӀабихьар «Малхилг» яхача берий беша. Цу тайпара Росгварде Наьсарен даькъо, цӀерца къовсам лоаттабара йолча болхлой тоабо, МЧСа №1 йолча цӀерах кӀалхарваккхара болхлоша цхьана вӀашагӀбелла из болх дӀабихьар. Хьалххе а вӀашагӀделлача беса, берий утренник долаш ашарий зале нийсделар чоалхане хьал. Бераш а хьехархой а сиха арабаьхар, из бахьан долаш из хьал юхатоха таро хилар», - аьлар хоамо.
Белгалду, уж Ӏомалуш йола кхетаченаш дӀаяхьале, говзанчаш хьежар цӀера кхерамзлен даькъ тӀа кхоачамбоацараш дий.
«Деша даха ха йоацача берий беша болхоша шоаш дика кийчо яь хилар хьагойтар. Цул совгӀа, каст-каста из болх дӀахьош хиларах, берий беша эггара зӀамагӀачарна а хов кхерамзлен хоам хьакхоаче хьалхарча аргӀагӀа де дезар фуд», - аьлар Росгварде даькъ тӀарча урхаллен цӀера кхерамзлен инспекце кулгалхо волча Маценаькъан Рамзана.
