«Цун бахьан да, бераш аьхки дешара цӀагӀа долаш дӀахьош йола ха пайда болаш хилийтар. ГӀалгӀай Республике гӀолла йолча МВД чуйоагӀаш йола Юкъарча совета, ГӀалгӀай республикан МВД викалаша хӀара шера дакъа лоац цу юкъе»,- аьлар хоамо.

«Мехкдаьттхо» яхача МагӀалбика- Шахьара лагере, «Къона Даьхе езар» яхача мехкацара безам совбаккхара йолча центра доазон тӀа, Юкъарлонна совета аларах берашта кийчъяь программа дӀайихьар.

Цига дакъа лоацаш хилар моттигерча МВД Юкъарча совета кулгалхо Гаданаькъан Муса, ГӀалгӀай Республике гӀолла йолча МВД УООП кулгалхо, полице полковник Къоастой Ӏамархан, Россе МВД «Малгобекский» МО чуйоагӀача Юкъарча совета доакъашхо Цхьорой Ӏалаудин.

Цига ладувгӀаш хиннача берашка ше къамаьл деш, Йоакъапа Мусас белгалдир, республикан полице дика балхах кхеташ, денал долаш бола болхлой къахьегаш хилар, царгара масал эца йиш хилар. Карарча шера дика салаӀар ловш, ловца а баьккхар берашта.

Программа дӀахохьош, ловзара кепе дӀагойтар полице болх миштаб. Росгварде болхлоша берашта гойтар латар, дӀахо боккха теркам тӀаозаш бар, зуламхо хьалоацаш, цар гойта болх.

Шоай балха тӀа накъадоалаш дола жӀалеш Ӏомадара гӀулакх а гойтар. Немций овчарка оалача жӀале дика кхоачашдора шийна тӀадилла декхар, къайлагӀа дӀайилла хӀама сиха хьалохар.

ГӀалгӀай Республике гӀолла йолча МВД УООП болхлоша берашта мерза совгӀаташ ийцар, иштта берий самукъадоаккхаш аниматораш-йовхьаш ловзаераш бар, цар сакъердаме дерзадир берий вӀашагӀкхетар, халхараш а дир, ашараш а лекхар.

Цу кхетачено дукха йицлургйоацаш йола дика моттигаш дагахьа йитар берашта а полице болхлошта а. Цу тайпара кхетаченаш кхы а дӀаяхьа лерхӀ. ДӀа-юха къасташ, бераша чӀоагӀо елар бокъонаш лораяра болхлошта дика деша, спорте дакъа лаца, бокъонаш цӀаккха а телха ца е.