Гӏалгӏайчен РДНТ кулгалхочо ерригроссийски кхетаче дакъа лаьцар
Гӏалгӏайчен халкъа кхоллама, культуран кхетачений Республикански Цӏен кулгалхочо Зурабанаькъан Ахьмада дакъа лаьцар халкъа кхоллама моттигерча центра кулгалхой совещани дӏахьош видеоконференце бувзамах. Халкъа кхоллам дегӏабоалабара, лорабара болх лелабеш йолча моттигий викалаш бар дакъа лоацаш хиннараш. Цига кулгал деш яр, В.Д. Поленова халкъа кхоллама Паччахьалкхен Российски Цӏен кулгалхо Пуртова Тамара.
«Керттера дийца дош дар 2026 шера лоархӏамегӏа йола кхетаченаш дӏаяхьар. Россе Президента Амарах, карара шу белгалдаьд Россе къамий цхьоагӏон Шу да, аьнна. Укх бӏарчча шера вай тӏахьех этнокультуран тӏехьале лораяра, цу даькъ тӏара болх чӏоагӏбара, дегӏабоалабара.
Лоархӏаме терко тӏайохийтаргья дукха кхетаченаш дӏаяхьара, уж я: Vӏ-гӏа Ерригроссийски берий Фольклориада, «Россе Дезал. Дезалера барт - мехка цхьоагӏо!», Ерригроссийски фестиваль - Россе къамий ашарий гӏирсашка хьажар, «Росси: этнически атто», из хетаяь я Россе къамий культуран Центра 10 шу дизара, иштта Ерригроссийски фестиваль - кхоллама тоабай яхь, цига котбаьннарашта гранташ лургья», - аьлар «Сердало» газетага Зурабанаькъан Ахьмада.
Россе къамий цхьоагӏон шу хургда сийрдача кхоллама, бувзама, мехка цхьоагӏон шу. Дӏахо дӏахьоргба Россе къамий мах баь варгвоаца тӏехьале лораяра болх. Еррига проекташ хьакхоллара низ чубоссийташ да, российски культуран юкъардар, цун мах бараш.
