Дешархой лоамашка хьажа бигар
«Хьалхарчар болама» моттигерча даькъо вӀашагӀъеллар дешархошта йоккха экскурси, ГӀалгӀайчен лоаман даькъ тӀа, яхаш, хоам бу «Сердало» газетага болама зарбан болх лелабераша.
«Из кхетаче дӀайихьар «Туристий вӀашагӀкхетар» яхача мехка программа чуйоагӀаш. Из болх вӀашагӀбеллараша яхачох, юкъара гӀулакх леладерий таро хилар хьамсарча мехка сийленгаш шоай бӀаргашца го а довза а.
Экскурсена чудоагӀаш дар лоамарой хьалха хинна вахар довзар, цу моттигера хьал довзийташ царца бар гидаш, цар лаьрххӀа дувцар дӀаяхача заман чухьа наьха хиннача вахарах, иштта тахан а вайга башха дика хьакхаьча даланза долча даьй Ӏадатех», - аьлар хоамо.
Дешархой чӀоагӀа безам тӀабодаш бар, къаьстта Эка-ЧӀожерча хьастанна, из массайолча туристически оагӀонашка лелаеш йола моттиг я, ший хозалца цӀихеза а я. Иштта эггара йоккхагӀа йолча гӀалай моттиге Аьга-Кхале а баха хилар уж, из бахьан долаш кхы а безамегӀа, лоархӀамегӀа хилар цар никъ, шоаш доаккхал ду вай хьамсарча мехках, яхаш, дийцар бераша.
