«Мехка сагӀа» яха болам дӀахьоча, новкъостал деш ба гӀо деш лелараш
ХӀара шера вай мехка хьаллоацаш болча «Мехка сагӀа» яхача боламе, дакъа лоацаш хул гӀо деш лелараш. Селхан денз кадай къахьегаш, кхачан тӀормигаш кийчдеш ба уж. Из хоам «Сердалога» бир гӀо деш леларий оагӀоно.
«ДегӀа могашал эшаеннарашта, бошта, хала боахкарашта, СВО доакъашхой дезалашта , иштта кхыбарашта лаьрхӀа кхачан тӀормигаш хьалдузаш болх дӀабихьар кагирхоша. Вай Мехкадас Келаматанаькъан Махьмуд-Ӏаьлас чӀоагӀо яь дӀахьош долча сагӀанна новкъостал деш, хьаллаца ловш ба вай гӀо деш лела кагирхой. Мехка Къаман ганзерча рузкъах дӀахьош да из Даьла раьза хургвола гӀулакх», - йоах хоамо.
Республикерча гӀо деш леларий оагӀон хьалхалаттача Галай Назира белгалдечох, гӀо деш лелараш укх тӀехьарча кхаь шера Даьла духьа дӀахьоча доккхача гӀулакхашка дакъа лоацаш хьабоагӀа.
