ЖӀайрахьа кхалера цӀи йоае оарцагӀбаьлар шоай лоӀамагӀа гӀо деш лелараш
17.07.2024 10:10
Шоай лоӀамагӀа гӀо деш лелараша лоаман моттигашка яржаш латта цӀи дӀайоае новкъостал дергда МЧС болхлошта. Из хоам «Сердалога» бир гӀо деш леларий оагӀон кулгалхочун гӀонча волча Гоамакортанаькъан Мустафас.
«Ӏуррехьа кийчо яь, урагӀбахаб кагий нах цӀи яьннача. Къонача гварде доакъашхой, гӀо деш лелараш оарцагӀбаьннаб шоашта могаш дола новкъостал де», - йоах хоамо.
ЖӀайрахьарча хьунагӀа цӀи яьлар, укх бетта 15-ча дийнахьа. ЦӀи ялара бахьан лоархӀ, мехка латташ йолча геттара лакхача йӀовхалах.
