ИнгГУ «Юкъара истори» яхача кафедра доцента дешархошца къамаьл дир
Республикерча паччахьалкхен университете «Юкъара истори» яхача кафедра доцент йолаш болх беча политически Ӏилмай кандидата Матенаькъан Венерас Эбарга-Юрта лекци йийшар. «Сердалога» из хоам бир исторех йолча факультета зарбан болх лелабераша.
«Эбарга-Юртарча № 4 йолча ишкола дешархошцара кхетаче «Берашта тӀемах лаьца деша вай» яха болам хьаллоацаш дӀайихьар. Дукха къахьегаш хьайоагӀача хьехархочо кхувш латтарашта дийцар литературан тайп-тайпарча йоазонех.
Геттара чӀоагӀа дезаделар берашта Лавренев Бориса яздаь «Вихров яха саг» цӀи йола, 13 шу даьннача кӀаьнка-разведчика Вихров Николая турпала наькъаш дувцаш дола дувцар»,- йоах хоамо. Алексеев Сергейс яздаь «Малютка» яха 30-ча гвардейски танкех латтача тоабан исторех дола дувцар берашта довзийташ Матенаькъан Венерас белгалдир, Россе бӀухой массахана денал долаш, майра хиннилга.
«Берашта тӀемах лаьца деш вай» яха болам вай боккхача мехка селханара истори довргдоацаш, турпалхой цӀераш йовзаргйолаш, дӀахьош ба.
