Вахар хаьдача СВО доакъашхочун мехкарашта, дешар дӀаходахьа гӀо дир
«Даьхен лорбой» яхача ганза болхлой болча енача, тӀема операцена юкъе вахар хаьдача бӀухочун Марзбиканаькъан Хьасана цӀен-нанас дехар дир; МЧС колледжа унахцӀенон гӀулакхех йолча факультете ший ши йоӀ деша оттае гӀо де, аьнна. Цу гӀулакха оарцагӀваьлар ганза болхло Хазанаькъан ИбрахӀим. Колледжа кулгалхочун гӀончаца къамаьл деш, деррига тохкаш болх дӀабихьар цо. «Сердалога» из хоам бир ганзера.
Эшаш дола каьхаташ гулдеш, гӀо дир царна ганза болхлоша. Ма хулла сихагӀа из болх чакхбаккха хьажарах, каьхаташ ханнахьа чудала аьттув баьлар йиӀигий.
ТӀема операцена юкъе вахар хаьдача бӀухочун шаккха йоӀ, мах тела ца безаш, дешаш хургья колледже.
Шолжа-Шахьарерча МЧС колледжера шоай дешара никъ дӀаболабергба цар хьатӀабоагӀача бетта 1-ча дийнахьа.
БӀухочун дезало доккха баркал аьлар «Даьхен лорбой» яхача ганза болхло волча Хазанаькъан ИбрахӀима, иштта ганза балха хьалхалаттарашта, сиха оарцагӀбаьнна шоай гӀулакхага хьажарах. Да дӀаваьнна, халача хьале болча наха чӀоагӀа лоархӀаме да из.
